ನಿಶ್ಚಿತಾರ್ಥ

ಬದುಕಿನ ಎಲ್ಲಾ ಋತುಗಳನ್ನು ಹಂಚಿಕೊಳ್ಳುವ
ನನ್ನ ಪ್ರೀತಿಯ ಹುಡುಗಿಯನ್ವೇಷಣೆಯಲ್ಲಿ
ಅಷ್ಟ ದಿಕ್ಕಿಗೆ ನಿಷ್ಠೆ ಇಟ್ಟು
ಊರು-ಕೇರಿ ಸುತ್ತಿ ಅಮೇರಿಕೆಯಲ್ಲೆಲ್ಲಾ ಅರಸಿ ಬಂದರೂ
ಕಣ್ ಬಿಡಲಿಲ್ಲ ಆ ಸರ್ವಶಕ್ತನು!

ವ್ಯರ್ಥ ಪ್ರಯತ್ನದ ದೀರ್ಘಾಯುಸ್ಸನು ಶಪಿಸುತ್ತಾ
ಬಾಳಸಂಗಾತಿಯವಳು ಮರೀಚಿಕೆಯೇ?
ಹೀಗೆಂದು ಸ್ವಗತಕೆ ಪ್ರಶ್ನೆ ಮಾಡಲು
ಪಕ್ಕದೂರಿನಲ್ಲೇ ಇತ್ತು ಋಣಾನುಸಂಬಂಧ
ದೇವರಾಯನದುರ್ಗದ ತಪ್ಪಲಿನಲಿ ನಾಮದಚಿಲುಮೆಯ ತೀರದಲಿ
ಸೃಷ್ಟಿಕರ್ತನವನು ಕೊನೆಗೂ "ದೀಕ್ಷೆ" ಇತ್ತನು!!!

ಆ ಬಟ್ಟಲು ಕಂಗಳ ಸುಂದರಿಯ ಕಿರು ಹುಬ್ಬಿಗೆ ಮನಸೋತು
ನೀಳ ಕೇಶರಾಶಿಯ ಕಡುಕಪ್ಪು ಬಣ್ಣಕೆ ಶಿರಬಾಗಿ
ನಿರಾಭರಣ ಚೆಲುವೆಯ ಸಹಜತೆ-ಸರಳತೆಗೆ
ಮೈಮರೆತ ಆ ದಿನ
ಬೆವೆತು ಒದ್ದೆಯಾದ ನನ್ನ ಅಂಗೈಗೆ ಪಸೆ ಆರಿ ಒಣಗಿದ ನಾಲಿಗೆಯ ಸಂಗ
ನೆಲ ನೋಡಲಣಿಯಾದ ನಯನಗಳಿಗೆ ಡವಡವಗುಟ್ಟಿದ ಎದೆಬಡಿತದ ಒಡನಾಟ!!!

ಬಲಗೈಗೆ ತೊಡಿಸಿದ ಚಿನ್ನದುಂಗುರದ ಬೆಸುಗೆ
ನನ್ನಾಕೆ ಆಗುವವಳೊಂದಿಗಿನ ಸಲುಗೆ
ನಸುಗೆಂಪು ರಂಗಿನ ಸೀರೆಯ ನೆರಿಗೆ
ಪುರೋಹಿತರ ಮಂತ್ರದ ಲಗುಬಗೆ
ಹೂವಿನಹಾರದಲ್ಲಿದ್ದ ಪುಷ್ಪಕುಸುಮದ ಬಿಳುಪು
ಚಿನ್ನದೊಡವೆಯ ಚಿತ್ತಾಕರ್ಷಕ ಹೊಳಪು
ಮಿತ್ರವೃಂದದ ಮಿರುಗು, ಸೋದರ ಸಂಬಂಧಿಯ ಸೊಬಗು
ಮುನ್ನೂರು ಮುತ್ತೈದೆಯರ ಆಶೀರ್ವಚನ
ಇದೆಲ್ಲದಕೂ ಸಾಕ್ಷಿಯಾಗಿತ್ತು --
ಹಳೇ ಬೇರು, ಹೊಸ ಚಿಗುರು ಮತ್ತು ನಿಶ್ಚಿತಾರ್ಥದ ಆ ಸುದಿನ !!!

-- ಕಿರಣ್ ಜಯಂತ್

ಕನಸೊಂದು ತಾಕಿತು ನನ್ನೆದೆಯ, ಸಖಿ

ಕನಸೊಂದು ತಾಕಿತು ನನ್ನೆದೆಯ, ಸಖಿ 

ನೀ ಬರುವ ಹಾದಿಯಲ್ಲಿ

ಪುಷ್ಪಕಮಲಗಳ ಹಾಸಿಗೆ ಹಾಸಿ

ನೀ ತುಳಿದ ಮಲ್ಲಿಗೆಯ ಹೆಕ್ಕಿ 

ಕಣ್ಣಿಗೊತ್ತಿಕೊಳ್ಳುವ ಆಸೆ  

ಚಿನ್ನದ ಹರಿವಾಣ ಬೆಳ್ಳಿ ಮಿಳ್ಳೆ ತಂದು 

ಪಾದ ತೊಳೆಯುವಾಸೆ, ಹರಿಶಿಣ-ಕುಂಕುಮ ಹಚ್ಚುವಾಸೆ 

ನಿನ್ನ ಹೆಜ್ಜೆಗುರುತಿನ ನೀಲ ನಕ್ಷೆಯನು 

ತಲೆದಿಂಬು ಮಾಡಿಕೊಳ್ಳುವಾಸೆ

ನೀ ನೋಡೋ ಕಂಗಳಿಂದ ಪ್ರಪಂಚ ಕಾಣುವಾಸೆ 

ನಯನಮನೋಹರಿಯ ಸುಲೋಚನನಾಗುವಾಸೆ 

ಮಿಥ್ಯೆ ತಡೆದು ಭಾವ ತುಂಬಿ ಸುಭಾಷಿತ ನುಡಿಯುವಾಸೆ

ಕಲ್ಲು ಕಡೆದು ಜೀವ ತುಂಬಿ ಅಶ್ಮಿತನಾಗುವಾಸೆ 

ಕಾಮಧೇನು ಹಾಲು ತಂದು ಕುಡಿಸುವಾಸೆ

ನನ್ನ ಉಟ್ಟುಡುಗೆಯ ಅಂಚಿನಲಿ ನಿನ್ನ ಗಲ್ಲ ಒರೆಸುವಾಸೆ 

ನಿನ್ನ ಅಧರದಿಂದುದುರುವ ಸಿಹಿಮುತ್ತು ಆರಿಸುವಾಸೆ 

ಆ ಚಂದ ನಗುವಿನಾರಾಧಕನಾಗುವಾಸೆ 

ಬೆಳ್ಳಿ ರಥದಲಿ ಕೂರಿಸಿ ಕ್ಷೀರಾಭಿಷೇಕ ಮಾಡುವಾಸೆ 

ಆ ರಥದ ಗಾಲಿ ನಾನಾಗುವಾಸೆ 

ಕಲ್ಪತರು ಕಾಯಿ ತರಿಸಿ ಅರ್ಚನೆ ಮಾಡುವಾಸೆ 

ಪಂಚಭೂತ ಧನ್ಯನಾಗುವಾಸೆ!!


ನನಸಾಗುತಲಿದೆ ಸಖಿ ನನ್ನೆದೆಯ ಕನಸು 
ಸುಮಂಗಳೆಯರು ಹಳದಿಚಂದನ ಹಚ್ಚುವ ಹಸೆ 
ಅಗ್ನಿ ಸಾಕ್ಷಿಯಾಗಿ ಸಪ್ತಪದಿ ತುಳಿದು,
ಕ್ಷೀರ ಸಾಕ್ಷಿಯಾಗಿ ಕಲ್ಪತರು ಕಾಯಿ ಹಿಡಿದು 
ನೀ ನನ್ನವಳೆಂದು, ನಾ ನಿನ್ನವನೆಂದು ಪ್ರತಿಜ್ಞೆ ಮಾಡುವ ದೆಸೆ!! 


ಕನಸೊಂದು ತಾಕಿತು ನನ್ನೆದೆಯ, ಸಖಿ 
ಮರೆಯಾಗುವುದಾದರೆ ಮರಳಿ ಮಣ್ಣಿನಲಿ ನಿನ್ನನು ಸೇರುವಾಸೆ  
ಏಳೇಳು ಜನುಮದಲೂ ನಿನ್ನಲಿ ಬೆರೆತು ಒಂದಾಗುವಾಸೆ!!

ಮನದ ಮುಗಿಲಿನಲ್ಲಿ

ಕಾಂತಿಹೀನ ಪಡುನೇಸರ ಬೇಸರ ಕಳೆದು  

ಮೂಡಲದಿಕ್ಕಿನಲಿ ಕಾಂತಿವೆತ್ತ ರವಿಯಾದ 

ನೆಗೆಯುವ ಕೆಂದೂಳಿ ಹೊತ್ತು ತಂದು 

ನೀಲಿ ಬಾನಿಗೆ ಕಿತ್ತಳೆ ಬಣ್ಣ ಬಳಿದ 

ಮುಗಿಲ ಖೈದಿಯಾಗಿ ಬದುಕು ಬೇಡವೆಂದು 

ಮಳೆರಾಯನವನು ಮುಸುಲಧಾರೆಯಾದ    

ಹನಿ ಹನಿ ಮುಂಗಾರು ತಂದು

ಇಳೆಯ ಧಗೆಯ ಲಘುವಾಗಿಸಿದ 

ಹನಿಯು ಬರಿದಾಗಿ ಚಿಂತೆ ಕಾಡಲು 

ಬಿರಿಯುವ ಬಿಸಿಲ್ಗುದುರೆಯಾದ 

ಸಪ್ತ ವರ್ಣಗಳ ಚಿತ್ತಾರ ತಂದು 

ರಂಗು-ರಂಗಿನ ಮಳೆಬಿಲ್ಲು ರಚಿಸಿದ 

ಅಮಾವಾಸ್ಯೆ ಇರುಳ ಕರಿನೆರಳಿಗೆ ಬೆಚ್ಚಿ ಬಿದ್ದು 

ಶಶಾಂಕನವನು ನಾಗಲೋಟದ ಕೋಲ್ಮಿಂಚಾದ 

ಬೆಳ್ಳಿ ಕೊಡೆ ಹೊತ್ತು ತಂದು 

ಕಪ್ಪಡರಿದ ಕಾರ್ಮುಗಿಲಿಗೆ ಕಿಚ್ಚನಚ್ಚಿದ